گجرات (صابر علی صابر) ڈپٹی کمشنر گجرات، سیف انور جپہ نے کہا ہے کہ ستمبر 1965کی جنگ میں افواج پاکستان نے دفاع وطن کیلئے جرات و بہادری کی لازوال داستانیں رقم کیں، دھرتی کے سپوت میجر راجہ عزیز بھٹی شہید، میجر شبیر شریف شہید نے وطن کی سرحدوں کا دفاع کرتے ہوئے جرات و بہادری کے عظیم کارنامے سرانجام دیے اور نشان حیدر کا اعزاز حاصل کیا جس پر گجرات کے ہر شہری کو فخر ہے۔

ان خیالات کا اظہار انہوں نے یوم دفاع کے موقع پر موضع لادیاں میں میجر راجہ عزیز بھٹی شہید کے مزار پر تقریب کے دوران کیا، ڈپٹی کمشنر سیف انور جپہ نے مہمان خصوصی جی او سی کھاریاں میجر جنرل احسن گلریز اور میجر (ر) ظفر بھٹی کے ہمراہ، میجر راجہ عزیز بھٹی شہید کے مزار پر پھولوں کی چادر بھی چڑھائی، اے سی کھاریاں فیصل عباس مانگٹ، پاک فوج کے افسران، میجر عزیز بھٹی شہید کے اہلخانہ بھی موجود تھے۔

ڈپٹی کمشنر سیف انور جپہ نے کہا کہ 1965کی جنگ میں ازلی دشمن بھارت نے پاکستان پر حملہ کرکے سنگین غلطی کی تھی، پاکستانی قوم کی مدد سے افواج پاکستان نے اسے ایسا سبق سکھایا جو وہ کبھی بھول نہیں سکے گا۔ انہوں نے قیام پاکستان سے ابتک دفاع وطن کیلئے اور دہشتگردی کے خلاف جنگ میں جانوں کا نذرانہ پیش کرنیوالے مسلح افواج، پولیس سمیت سکیورٹی فورسز کے افسران و جوانوں، سویلنز اور غازیوں کو زبردست خراج تحسین پیش کیا اور کہا کہ سرحدوں پر الرٹ مسلح افواج کے افسران و جوانوں کیوجہ سے ہر پاکستانی محفوظ ہے۔